Nyadi nyabong manok tu endang siti ari uti asal bansa iban. Uti bansa tu bentaruh ka nyawa manok ti disabong. Ari ka bebuti nyabong ngelaban pangan diri nya tadi, penemu sabong kitai Iban pan ngerembai sereta mansang ari serak siti ngagai serak siti. Balai nyabong tu lalu nyadi ka endor kitai Iban nguji ka penalam penemu siko-siko anak Iban ba pasal bulu enggau tuah manok. Bulu enggau tuah manok tu tau dibacha ari satiap endor ba tuboh manok nya empu – ari pala nyentok ka ujong kaki, ari patok nyentok ka ujong langgai. Laban bulu manok bisi bendar besangkut paut enggau chura utai ti idup dalam dunya nyata tu, anak Iban lalu barengkah merati sereta belajar ka jalai enggau tusun pendiau utai ti idup nya tadi. Ari nya tadi, maioh bendar penemu tau ditimba nyadi ka chuan jalai pengidup anak Iban. Ari penemu nya tadi, sida nemu bebasa ka semua utai ke idup ngelingi pendiau sida lalu enda sapeneka ati masau tauka ngayah utai idup nya tadi. Bedudok ari nya tadi, kitai iban lalu niri ka balai nyabong, endor kitai begempuru bejurai ka maioh macham pekara ngena penemu ti udah ditimba. Pengawa nyabong tu tadi lalu nyadi siti ari main asal bansa Iban endor kitai nentu ka pemetul penemu ti udah ditimba siko-siko anak sabong. Enti main asal tu diketu ka, maioh penemu asal tauka penemu lama kitai Iban tau lenyau ngapa, lalu bansa kitai tau nadai dikelala orang agi laban main asal kitai udah pupus.

Nyadi keterubah iya orang bebuti belaban nyabong manok nya Raja Machan ngelaban Ambong Mungan. Nyadi Ambong Mungan tu alah sabong laban Raja Macham. Malu alah nyabong, nya alai Ambong Mungan belelang ngiga manok sabong ngagai sida Keling di Panggau Libau. Bulu manok ke deka digiga iya nya tuntong lang ngindang terbai, biring belangking pipit kechuai. Datai iya di Panggau Libau, dia Keling madah ka diri nadai ngidup ka manok ngemanah nya bulu. Iya lalu ngasoh Ambong Mungan ngiga ngagai rumah sida Sengalang Burong, laban sida din suah didinga bisi nupi manok manah bulu.

Ninga ajar Keling, Ambong Mungan lalu mupok ngagai rumah sida Sengalang Burong. Datai iya ba Aki Lang, iya lalu nusoi penemuai diri ngagai sida iya. Aki Lang lalu madah ka diri nadai nupi manok ngemanah nya bulu. Iya lalu ngajar Ambong Mungan ngiga manok ngagai Petara ka langit.

Udah tembu berandau enggau Sengalang Burong, Ambong Mungan pan lalu mupok. Nyau ka lama iya udah bejalai, iya pan datai ba Lembang Palang Subang, Nyeliah ka karang miga segala, datai di tuchong bukit sigi besenggal tinggi, nyagu ka lengi moa benda, endor rumah Raja Petara. Datai iya di rumah, iya lalu nusoi penemuai diri ke ngiga manok bulu tuntong lang ngindang terbai, biring belangking pipit kechuai.

Raja Petara madah ka diri bisi nupi manok bulu nya. Tang leboh nya manok nya udah bejalai jauh ngair ka langit. Udah iya ninga penemuai Ambong Mungan, Raja Petara lalu ngambi umpan kena iya ngumbai manok nya pulai kia. Enda bangat lama udah iya ngumbai, manok nya pan datai beteratak inggar bendar. Bulu manok nya ngenjing perenching peda Ambong Mungan. Udah manok nya ditangkap, Petara madah ka manok nya enda tau alah disabong. Ninga jako Petara munyi nya, Ambong Mungan gaga bendar ati, laban manok ke diambi iya nya enda tau alah disabong.

Udah nya Ambong Mungan mulai ka diri. Datai iya di rumah, iya ninga Kendawa pen udah ga nyau ngiga manok sabong ka menoa sebayan, nepat Ensing Jara. Nyadi bulu manok giga Kendawa nya biring gerunggang. Ambong Mungan lalu nyabong baru ngelaban Raja Machan. Raja Machan pan alah nyabong ngelaban iya, laban manok ke disabong iya nya endang disumpah Petara enda tau alah.

Nyadi Ensing Jara ke ditepat ka Kendawa ngiga manok di Sebayan nya Antu Anda Penyabong ke ngemata ka samengat manok ke mati disabong kitai di menua tu.

RUKUN SABONG

1. Mimpi rurus – Manah

2. Burong rurus – Manah

3. Bulu manok maioh bunoh – Ngeraup – Siti Bulu

4. Manok manah bintih – Kering sereta Silat

5. Tisik ngemudi ka bulu manok ti manah – Tuah

6. Ngangkat ka manok ngena hari – enggau atur

7. Saa manok enggau chukup – manah intu

8. Taji ka bulih – tajam

Lapan iti Rukun Sabong ti diterang ka datas nya, rukun sabong menang, enda bertuakal agi, tentu menang. Nya baru tau berani masang manok naka pemisi, tau dipasang nerima pasang besai.

Enti kita nyabong enda ngena rukun sabong datas nya, kita semina nyabong enggau buta-tuli, sapeneka ati aja, nyabong betuakal, nyabong nasit, nyabong ngapa, nyabong nadai penemu, nyabong nadai pelajar. Tampak bendar kitai enda nemu nyabong dipeda orang ti bisi ngembuan pelajar nyabong.

Enti udah belajar sereta nemu rukun sabong, nya baru tau nyatup orang nyabong sabarang maia lalu manok ke dibai kita ka gelanggang endang disadang menang. Baka kitai ka ngerja pengawa bukai, kitai mesti bisi petua, isharat enggau rukun awak ka pengawa kitai lurus pejalai. Nadai semua utai nyamai sereta mudah diulih kitai enti enda enggau petua, isharat enggau rukun. Kitai enda tau ngutuk diri empu enti alah kategal salah petua, isharat tauka rukun, laban penyalah nya endang penyalah kitai empu ti enda chukup pelajar tauka penyabar dalam pengawa nyabong.

Besabong ka manok tu baka pengawa kitai mensia ka bentaruh ka nyawa bebuti enggau pangan diri. Sapa alah, nya mati. Nya kabuah kitai enda tau enda betati ka tiap-tiap rukun sabong, enggai ka alah uti enggau pangan diri. Kelia, enti alah uti enggau pangan diri, ngagai ringka ga pemulai sida. Nya alai rukun sabong enda tau enda dipelajar awak ka enda lebu bebuti enggau pangan diri.

NGELALA BULU MANOK

Bansa kitai iban endang udah lama bisi panemu ngelala bulu manok. Ngelala bulu manok tu siti panemu sabong ti nyelai bendar enti dibanding enggau panemu bansa bukai ke sama bekunsi ka uti sabong bakatu. Bulu manok endang dikelala bansa iban nyemaka semua bansa utai ti idup (jelu, burong, ikan, indu utai enggau bansa utai tumboh) baik ka di dalam ai tauka di darat. Lalu pengangkat bulu manok mega ditemu kitai bansa nitih ka ulah, bunyi, gaya, pendiau enggau pemakai utai idup ti sabaka bulu enggau manok nya. Bakanya mega tuah manok ti dipeda kitai ba tuboh enggau ba tisik kaki manok sabong kitai. Tisik enggau tuah manok endang nitih ka pemai enggau gamal utai idup ti sabaka nama enggau bulu sida. Semua ulah enggau pendiau utai idup ti nyemaka enggau bulu manok endang dipelajar ka kitai Iban ngambi ka nemu maia hari sida kering, maia sida makai, maia sida diau, bansa utai di empa sida enggau maia ulah bukai. Semua utai tu endang bisi sangkut-paut enggau maia kitai nyabong manok sereta enggau sapa bulu manok ti disabong kitai nya ninggang pangan diri. Ari tuah enggau bulu manok, orang ke nemu nyabong endang nemu ni bagi manok ke bebintih nya tau dulu datai kaki ba lawan diri.

Bedudok ari pelajar sabong tu anak pungka lelaki Iban kelia endang udah diajar ngelala bulu manok kenyau ari sida iya agi biak. Sida mega diajar ngintu manok sabong ti aroh ati diri empu. Enti sida nyau udah nyadi ka manok sabong orang, sida nemu ngambu bulu manok sabong nyadi ka tanda pemerani sida tauka pengering bulu diri. Pengawa ngambu bulu manok sabong tu dikerja chara besumpah ngena darah munsoh ka udah didengah sida. Bulu manok sabong tu beguna bendar dikena miau enggau niki ka bala Raja Berani enggau Bujang Berani enti sida diambi ngerja pengawa gawai besai kitai bansa. Enti salah bulu manok dikena, pengawa sida tau sabau ngapa laban salah ripih pengawa lalu enda chukup intu. Utai baka tu tau ngemedis ka orang ka bempu pengawa. Nya kabuah ngadu enggau ngintu pengawa ba pengarap bansa kitai Iban pedis bendar enti nadai penemu ti chukup kena ngerja pengawa. Nya alai anak Iban enda tau enda nemu ngelala bulu manok, ukai semina dikena bebuti nyabong aja, tang mega ka penemu kena ngerja pengawa pengarap kitai bansa.

(Cock fighting is a traditional game that the Iban universally play in Sarawak, it's a game said to be first played by the deities.)

GAWAI Mangkung Tiang iya nya sebengkah pengerami tauka gawai ti diintu raban bansa Iban.

Reti Gawai Mangkung Tiang tu iya nya pengawa rami tauka besampi ke rumah panjai ti baru udah tembu didiri tauka baru endur diau. Enti sema Gawai Mangkung Tiang udah diintu ba pengawa ti nepan rumah baru, dia rumah panjai nya tadi likun endur diau lalu nadai penti pemali bukai.

Gawai Mangkung Tiang tu mega pengawa ti keterubah mesti diintu sebedau bejalaika gawai tauka pengerami bukai. Pia mega, Gawai Mangkung Tiang tu gawai ti keterubah iya mesti diintu ba seseiti rumah baru alai endur diau. Nyema Gawai Mangkung Tiang tu udah nyadi, dia nadai salah nirika gawai bukai ba dalam rumah nya.

Gawai Mangkung tiang tu iya nya sebengkah ari adat kitai turun temurun raban bansa Iban. Nya alai orang ti nyadi ketuai dalam pengawa tu mesti orang ti endang sigi landik tauka bepenemu senentang atur ngintu Gawai Mangkung Tiang ngambika rumah ti endur diau nya tadi enda sial, nadai penimpang enggau pengurang.

Sida ke nyadi tuai adat tauka Lemambang Gawai tu dibagi dua, iya nya Pedara ngichaka burung ti jai dibuai di tanah, lalu burung ti ngemai tuah dikangau niki ke rumah panjai. Reti iya tadi, ngambika tuah tauka utai ke manah enggau diau dalam rumah, lalu utai ti ngemai pemali tauka sial ditinggal ba tanah.

Pengudah nya tadi, Lemambang tama ke rumah panjai lalu bejalai niti ruai rumah panjai sereta besundang dulu sebedau nuju alai pandung besai ba ruai Tuai Rumah di tengah rumah panjai.

Datai ba pandung nya tadi, sida lalu nudukka diri sereta ngatur piring ba pandung nya. Nyadi pandung besai ti didiri ba alai ruai Tuai Rumah nya tadi pandung ti besai, lalu pandung mit mega bisi didiri ba tiap ruai pintu rumah panjai nya empu.

Udah piring pandung tembu disedia, maya hari udah ngalih ke lemai, sida Lemambang lalu niki ke rumah ditangkanka bala pengabang ti bisi datai ngulu pengerami Mangkung Tiang.

Udah nya, bala Lemambang lalu ngatur pengawa mengap. Pengawa mengap tu dipejalaika sepemanjai malam. Bala ke bukai ke bisi ba rumah panjai nya tadi lalu rami sereta begendang, bebuti, begagai sampaika pagi.

Maya Lemambang deka mangkung tiang, perengka tauka kereban ti dikena bepangkung ke tiang iya nya ruas ti bisi asi pulut enggau kayu lemuni. Pengudah nya, piring enggau ai lalu disedia. Nyadi ai ke disedia nya kena nanjah tiang tauka masu tiang, udah nya batu perunsut kena ‘nuchi’ tiang. Penembu nya, tiang nya tadi deka diunsut enggau engkelih (minyak rengut).

Ba adat bansa Iban, ruas asi pulut nya tadi dikena mangkung tiang ti udah dipengap sereta besampi ngagau ke Petara. Kelimpah ari nya, tiang rumah ti deka dipangkung nya tadi dikumbai tiang bedau idup. Nyadi tiang nya deka dipangkung ngambika tiang nya pan bisi semengat idup lalu nemu nyambut piring ti udah disedia nya tadi. Pia mega tiang dikearapka ngemai pengelikun, pengerai, chelap lindap, meri reta enggau pengeraja sereta tuah enggau limpah.

Sepengudah sekeda pengawa ti udah diatur, dia bala Lemambang lalu neruska pengawa mengap niti ruai rumah. Pengawa nya dikena sida ngagauka bala Petara. Pengawa mengap tu tadi dipajak datai ke dini hari udah dinga bunyi manuk engkukuk.

Sekali tu, tiang pemun lalu berengkah dipengap, dibasu lalu diasuh idup ngambika ulih nyukung tauka ngempung migai sekayu ke bisi diau ba rumah panjai.

Lemambang lalu tama ngagai tiap-tiap ruang bilik lalu bejalaika pengawa mangkung tiang dalam setiap pintu bilik. Enti udah apus semua tiang dalam sesetiap bilik nya dipangkung, sida lemambang lalu pulai ke pandung ti bisi ditengah ruai nya tadi.

Udah ke nuntung ba tengah ruai nya tadi, pandung lalu berengkah dibuka sereta dilerai. Pengawa Mangkung Tiang nya tadi udah tembu lalu pengabang pun pulai magang. Lengkap Pengawa Mangkung Tiang udah diintu, lalu rumah panjai nya likun endur diau.

Raban bansa Iban rebak diatu taja pan udah mayuh enda diau di rumah panjai, sida mengkang bejalaika pengawa Mangkung Tiang. Taja pan pengidup mensia nyau jauh moden, adat raban bansa Iban sigi enda kala puntan, ari adat berengkah ngentak rumah baru, nyentuk ke adat Mangkung Tiang endang bisi dipejalaika nyentuk k sehari tu.

Ba rambau kitai Iban ke betuai ka Bejie Nangga Ari Patah Titi Jamban Penjuang kelia, kitai endang sigi nadai pendiau enggau pengarap ke tetap di pegai. Sida Bejie agi diau dalam babas serta enggau lubang gua ti bisi sabelah menoa nya. Batang pengidup enggau pendiau sida iya bepanggai ba pengawa begiga ka pemakai sabelah babas, dalam kampong puang enggau sabelah sungai ti bisi basemak menoa ke endor sida iya diau. Sida nadai ngerja pengawa betanam betupi serta nadai pendiau ti tetap baka pengidup ti dikemeran ka kitai kemaia hari tu.

Nyadi bansa bukai ke diau di ili menoa sida Bejie tu, endang lebih mansang agi ari bansa kitai. Kabuah pia, laban sida iya bisi agi pelajar enggau penemu kena nusun pendiau diri. Penemu tu dibai bansa bukai ke bisi nampil pendiau sida, baka bansa Arab, Minangkabau, Sumatra enggau bansa Jawa. Pendiau sida tu tetap agi laban sida ngemeran ka pengawa betanam betupi enggau pengawa bedagang, belayar sabelah pulau Borneo, Jawa, Sumatra enggau tanah besai Malaya. Sida mega balat bendar ngarembai ka pengarap sida sabelah rantau tu, lebih agi orang ke megai pengarap Islam. Kebuah sida iya baka nya, laban sida deka ngerembai ka kuasa perintah sida ngagai bansa orang bukai, nyengkaum bansa Dayak ke diau dalam pulau Borneo tu. Ari nya tadi sida tau bekuasa megai menoa enggau pengeraja menoa tu. Lalu pengawa baka tu endang dipupuk sida ari serak siti ngagai serak siti, sampai ka kemaia hari tu. Pengarap bukai, baka pengarap Hindu enggau pengarap Buddha ke dulu betapak di rantau tu kelia pan barengkah bapechah ngagai sabelah tisau menoa nyengkaum pulau Borneo enggau pulau Bali. Bala kerabat Raja ke enggai masok ugama baru nya lalu pindah ngagai menoa bukai, baka sida Raja Durong enggau Orang Panggau-Gelong. Sida lalu mai pengarap enggau penemu sida ngagai bansa kitai Iban. Nya kabuah dalam pengawa gawai, leka jako, atur pendiau enggau pangkat kitai Iban (e.g. Pateh, Temenggong, Penghulu, etc) bisi sabaka enggau orang ke megai pengarap Hindu tauka sabaka enggau leka jako serta pangkat ti dikena bansa Minangkabau. Pengawa gawai ke endang sabaka enggau sida tu iya nya pengawa miring enggau pengawa niri ka tiang chandi tauka kalingkang leboh kitai ngerja pengawa gawai burong.

Leboh tuai kitai Bejie enggau tuai-tuai bukai baum deka ngaga tangga dikena niki ka langit dikena batemu enggau petara ke nguasa ugama Islam, dia Bejie ngasoh menyadi iya benama Bada nyadi ka tuai nyaga serta ngiring bansa kitai Iban. Bada lalu nyadi ka tuai ngulu ka bala iya ngemeran ka pengawa ngasu, berikan enggau begiga ka utai bukai dikena ngidup ka bansa diri. Maia nya menya, kitai Iban diau enggau aman lalu nadai bemunsoh enggau bansa bukai, laban tuboh endang enda maioh lalu menoa pan agi puang serta lantang endor ngidup ka diri.

Nyadi sakali, leboh Bada enggau anembiak iya pulai ngasu, hari balat bendar ujan. Meda ujan ngemalat nya, sida lalu mampat daun kayu dikena ngelindong diri ari tinggang ujan ba rantu jalai. Datai sida dalam lubang batu endor sida diau, dia menyadi sida ke indu tak tekenyit meda sida ke pulai ngelaban ujan nya tadi enda basah. Bada lalu madah ka sida iya belindong baroh daun kayu, nya kabuah sida iya enda basah laban ujan.

Bechuan ka nya tadi, kitai Iban lalu nemu mampat daun dikena belindong ka ujan tau ka panas ke lalu dikumbai sida dunju. Udah ngasai ka penyamai ngendoh ka ujan enggau panas baroh dunju, nya baru sida nemu ngaga langkau ke tau alai diau, beatap ka daun kering. Barengkah ari nya, kitai Iban lalu nemu begiga enggau mindah jauh agi ari lubang batu ke alai kitai diau lalu ngujong ka kitai lalu badu agi diau dalam lubang batu.

Udah sida ngasai ka penyamai diau ba langkau nyembuah-nyembuah, runding sida pan mansang ari ke udah. Sida iya pan nyau nemu begaga ka dampa ke endor sida tau diau begulai maioh enggau pangan diri, lebih agi sida ke enggai jauh ari diri Sabilik bakunsi makai, bakunsi jalai ngidup ka diri.

Laban dampa nya mit, lalu tuboh pan nyau mansang maioh, sida ke diau dia pan berasai sekut. Ari nya tadi sida lalu nemu ngaga penaik enggau buka dampa nya besai agi, ke dikumbai sida iya rumah.

Leboh sida baru berumah, udah sida tembu ngentak ka tiang rumah, pagi hari siti leboh sida deka nampong pengawa sida, dia sida meda semua tiang ke udah didirika ka sida dulu ari nya rebah magang. Meda utai bakanya, sida alit bendar ati, nya alai sida lalu ngentak ka tiang nya baru. Pagi siti, leboh sida napat ka pengawa sida dia baru, peda sida tak udah rebah magang ga tiang rumah nya tadi. Tiga hari sida beturut ngentak ka tiang nya, tang tiang sida rebah berari-ari.

Ari siti sida lalu ngentak ka tiang nya dalam agi. Pagi siti leboh sida ngabas tiang sida dia, peda sida tak tengelam magang tiang sida nya tadi. Semina mimit aja agi dipeda bekachuit pansut ari tanah. Leboh sida Bada agi berunding ka utai ti nyelai bakanya, alai anak temuai siko bisi datai ari kampong lalu bejalai nuju sida dia. Iya lalu nanya ka pengawa sida ke begempuru dia. Bada lala madah ka diri deka berumah, tang lalu enda nyadi.

“Enti enda rebah, tengelam ga tiang dientak ka kami,” ko saut Bada.

“Kati alai bakanya, iya kati ka adat dikena kita berumah?” ko tanya anak temuai.

Bada lalu madah ka diri nadai adat dikena barumah, laban endang enda kala ngerja pengawa nya ngelamatu.

“Patut pengawa kita enda nyadi, laban kita nadai atur, nadai adat dikena ngerja utai,” ko anak temuai.

Ninga jako temuai munyi nya, Bada lalu minta ajar anak temuai adat kena barumah, awak ka tau ka chuan sida kedudi hari ila. Anak temuai nya pan lalu bejako madah ka tanah nya bisi orang empu. Enti mensia bisi pengawa ba tanah nya, sida enda tau enda meri tasih ngagai petara ke empu tanah, iya nya Raja Semarugah, mentua Raja Sempulang Gana. Bada lalu nanya ka jalai meri tasih tanah nya, laban Raja Semarugah enda nyengala, enda nyerupa dipeda enggau mata. Ninga tanya Bada munyi nya, anak temuai nya tadi lalu ngajat Bada munyi tu:

Kejang kita deka berumah, tiap-tiap iko tuai bilik enda tau enda dulu ngerembang.

Tuai ke diator dulu ngentak enda tau enda ngiga tambak burong nendak kanan lima iti enggau tambak nendak kiba tiga iti. Iya ke lima iti nya untong orang ke lelaki lalu iya ke tiga iti nya untong sida ke indu. Paung burong tu enda tau enda ditanjong ngagai tanah ke deka endor ngerembang, lalu engkah ka ba senentang bilik orang ke dulu ngentak. 

Kejang deka ngentak, indu enda tau enda dulu ngaga perengka piring.

Kejang deka ngelubang ka tiang pemun, babi tauka manok enda tau enda dibunoh. Dara iya dikena ngenselan tiang enggau lubang nya.

Batu kuai enggau repik besi enda tau enda dibai ka dalam lubang tiang pemun.

Udah tiang dientak, pating mumban ujak ka ba pun tiang nya.

Udah anak temuai ngara ka adat, nya baru iya madah ka piring enggau darah babi tauka manok nya jadi ka tasih tanah diberi ngagai Raja Semarugah ngena sampi.

Nyadi repik besi, batu kuai enggau pating mumban nya laban sida nya enda rarat taban ka ai baah, ngayu ka penegut enggau pengukoh rumah nya.

Enti ngentak ka tiang, enda tau enda dulu berengkah ba endor ke alai ngengkah tambak burong nya tadi. Nyadi tambak burong nya tadi disimpan dalam buloh lalu diengkah ka dalam dunju mit, udah nya dibagi tiap-tiap pintu orang ke ngentak dia.

Pia mega orang ke dulu ngentak nya nitih ka pun ramu. Udah abis orang ke pun ramu ngentak, nya baru orang ke ari ujong ramu sapiak tau ngentak ka tiang sida.

Udah abis jako anak temuai nya ngajar sida Bada adat dikena barumah, iya madah ka diri deka pulai. Iya lalu madah ka nama diri Puntang Raga, ke datai ngajar sida ari asoh Raja Semarugah. Udah nya iya lalu lesap.

FAKTA YG MENGEJUTKAN!!

Harus semua ambil iktibar...

SEBAB2 KENAPA PENJARA PUDU DITUTUP??!!

Berlaku di Penjara Pudu Kuala Lumpur di suatu ketika dulu. Hanya boleh disebarkan pada orang2 tertentu sahaja... Sebelum Penjara Pudu ditutup dulu pernah diceritakan bahawa terdapat satu bilik dipanggil "Bilik Terakhir". Dibilik inilah seringnya berlaku kejadian pelik sejak Penjara Pudu ditutup.